Ɓeɓotédí ɓá esukúlu ó Sawá

Mulanjo mwá etíkán á Littoral a tá ó muyɔ́mbɔ́ mwá nyuŋgumeyɛ na mɛnɛ lá ɓetɛ́médí ɓá ɓeɓotédí ɓá ɓesukúlu ó yala iwɔ́, kíɛlɛ nítómbí mínyá sǎmbá má nyɛtɛki ó mûn mbú.

Mínyá mílálo ómbúsá ɓeɓotédí ɓá esukúlu, SAMUEL DIEUDONNE IVAHA DIBOUA, a aló ɓákisɛ ŋga ɓeléédí ɓé ɓotédi na mbálɛ́. M̀ɓambá mílálo ó mínɛ̌y etíkán é ɓɛnnɔ́ méná mí kusí pɛ́pɛlɛ láō mí e ndé : Wouri, Moungo na Sanaga Maritime.

« Na kíki ná, na ɓomân ɓaléedi wúma tɛ́ ná tómbinɔ́. Na ɛ̂n pɛ́ ná ó CETIC nyá Diɓómbádí musɔŋgí mwá ɓaléedi, mú búki mû mwá ɓǒkwedi. Na sési ɓaɓɔ́ na mbá ná kwálísán ɓaɓɔ́ ná sětɔ ónyólá ná ɓá e ó ɓesukúlu ɓá mindi misadi ndé ɓá áŋgámɛ́nɛnɔ́ kɔ́ ɓwâla. Ó mǔdi mwá mitaka, na nɔŋgí mitila, na mɛndɛ́ ɓola ɓaɓɛ́nɛ́ mbɔ́ŋ á níka ɓoláŋgí ».

Ɓadíedi ɓɔɔ́ ɓá yála á ɓesukúlu ɓá mindi mísadi ɓá tombwánɛ yé eɓemá ó ɓóndɛ mitaka mábū má búnyá tɛ́.

MARIUS AFAGA MESSINA, mudíedi a yala á ndɛ́ki á jǒkwa nyá ɓosó nyá esukúlu á ɓeɓoló ɓá maá nyá Diɓómbádí, a kwáli ná : « Di masomɛ́lɛ́ ná yala ásū, CETIC nyá Diɓómbádí é timbe Lycée Technique, ná níka ní óŋgwanɛ ɓǒkwedi ó ɓɔ́lɛ esukúlu ábū ó wân ésiɓɛ́ pɛ́ wala wúma épɛ́pɛ̄ ónyólá makekisɛ ná ndɛ́ki á jǒkwa nílóndɛ́ íɓaá ».

Ka sáŋgó á Mbóa, SAMUEL DIEUDONNE IVAHA DIBOUA, a ɓolí ɓǒkwedi maléá na myano ó toŋgwɛlɛ ó mûn mbú mwá esukúlu.

THOMAS EYOUM